პედიატრიული ონკოლოგიური მომსახურების ერთადერთი მიმწოდებელი საქართველოში
ჩვენი ჰოსპიტალური ქსელი პედიატრიული ონკოლოგიური სერვისების ერთადერთი მიმწოდებელია საქართველოში და ონკოლოგიური დაავადებების მქონე პედიატრიულ პაციენტებს საჭირო სამედიცინო მომსახურებას სრულიად უფასოდ, სახელმწიფოს მიერ სუბსიდირებული პროგრამის ფარგლებში უწევს. 2024 წელს, სხვადასხვა ონკოლოგიური დაავადების (სიმსივნური წარმონაქმნები, ლეიკემია, ლიმფომა და ა.შ) მქონე 576-მა პაციენტმა მიიღო საჭირო კლინიკური სერვისი, 85-მა კი ონკოჰემატოლოგიური მკურნალობა გაიარა.
ხელმისაწვდომი სამედიცინო სერვისები
ჩვენ დიდი რესურსი ჩავდეთ იმაში, რომ ჯანდაცვის სერვისები ხელმისაწვდომი გაგვეხადა მათთვის, ვისაც ეს ყველაზე მეტად სჭირდება. 2024 წელს ჩვენს სამედიცინო დაწესებულებებში 27 113-მა პაციენტმა ისარგებლა 24 ტიპის უფასო სამედიცინო სკრინინგ-პროგრამით. პროგრამები მოიცავდა უფასო სამედიცინო შემოწმებას და სკრინინგს, მათ შორის - ტუბერკულოზის მართვის, ონკოლოგიური სკრინინგის, C ჰეპატიტის მართვისა და ანტენატალურ პროგრამებს. ჩვენს ჰოსპიტლებში უფასო სამედიცინო მომსახურების, მათ შორის სამედიცინო შემოწმების და სამკურნალო მომსახურების მიღება შეუძლიათ სოციალური და ეკონომიკური სირთულეების წინაშე მყოფ პირებს. გასული წელს, 1.8 მილიონი ლარი სწორედ ამ ჯგუფის პაციენტებისთვის უფასო კლინიკური მომსახურების მიწოდებას მოხმარდა. ჯანდაცვის სხვა ინსტიტუტებთან თანამშრომლობით, ჩვენს ქსელში შემავალ სამედიცინო პუნქტებში პაციენტებს ასევე შეუძლიათ ისარგებლონ სისხლის გადასხმის უფასო სერვისით. გარდა ამისა, საქართველოს სოლიდარობის ფონდის მხარდასაჭერად, ჰოსპიტალური ქსელი უფასო სამედიცინო მომსახურებას უწევდა ფონდის ბენეფიციარებს.
2024 წელს, ჩვენს სამედიცინო დაწესებულებებში უფასო სამედიცინო მომსახურებით 813-მა ბენეფიციარმა ისარგებლა. გარდა ამისა, ლეიკემიისა და სიმსივნის დიაგნოზის მქონე ბავშვების მხარდამჭერ საქველმოქედო ფონდს ვთავაზობდით 20%-იან ფასდაკლებას ნებისმიერი ტიპის სამედიცინო სერვისზე.
ჩვენი კლინიკებისა და ლიბერთი ბანკის ერთობლივი სოციალური პასუხისმგებლობის პროექტის ფარგლებში, პენსიონერებმა და სოციალურად დაუცველმა პირებმა ფასდაკლებით ისარგებლეს სტომატოლოგიური მომსახურებით. 2020 წელს, პროექტის დაწყებიდან, შეღავათიანი პირობებით 66 000-მა პაციენტმა 411 000 სამედიცინო მომსახურებით ისარგებლა.
ასევე, საქართველოს ბანკთან თანამშრომლობით დავიწყეთ პროექტი Healthy Club, რომლის ფარგლებშიც ცხოვრების ჯანსაღი წესი წახალისდა. აღსანიშნავია ისიც, რომ საქართველოს ბანკის ლოიალობის პროგრამაში ჩართულ მომხმარებლებს და ბანკის თანამშრომლებს კლინიკებში 40%-მდე ფასდაკლებებს ვთავაზობთ. 2024 წელს, კლუბის 64 000-მდე წევრს 200 000 სამედიცინო მომსახურება გავუწიეთ.
გარდა ამისა, წლის განმავლობაში მეგალაბმა მნიშნელოვანი ინვესტიცია ჩადო დასაქმებულთა განვითარებასა და კეთილდღეობაში. ერთ-ერთი მნიშნელოვანი ინიციატივა იყო უკრაინელი დასაქმებულებისთვის ლაბორატორიული ანალიზების უფასოდ ჩატარების პროგრამა, რომლის წლიურმა ღირებულებამაც დაახლოებით 5 000 ლარი შეადგინა. პროგრამის მიზანი იყო გუნდის უკრაინელ წევრებს აუცილებელი სამედიცინო მომსახურება უფასოდ მიეღოთ, ეგრძნოთ მხარდაჭერა და ყოფილიყვნენ უფრო მეტად ინტეგრირებულნი კომპანიაში.
ჩვენს დაწესებულებებში წარმოქმნილი სამედიცინო და ბიოლოგიური ნარჩენების უტილიზაცია
ჩვენ განვაგრძობთ ქაღალდის მოხმარების შემცირების წახალისებას. სწორედ ამიტომ, მრავალი ტიპის მატერიალური დოკუმენტაცია ჩავანაცვლეთ შესაბამისი პროგრამული უზრუნველყოფით და წამოვიწყეთ „მწვანე პროექტი", რომლის ფარგლებშიც სამედიცინო დაწესებულებებში განვათავსეთ ქაღალდის ნარჩენებისთვის განკუთვნილი სპეციალური ყუთები. ქაღალდის ნარჩენების ჩაბარების შედეგად მიღებული თანხა კი სხვადასხვა სოციალურ ღონისძიებას ხმარდება. 2024 წელს ჰოსპიტლებში მოხმარებული ქაღალდის წლიური რაოდენობა დაახლოებით 1 260 ტონას შეადგენდა.
ჩვენს ჰოსპიტლებში, სამედიცინო ნარჩენების უტილიზაციის წესები შეესაბამება ადგილობრივი კანონმდებლობით გათვალისწინებულ მოთხოვნებს. რისკების შესამცირებლად და სამართლებრივ მოთხოვნებთან მუდმივი შესაბამისობის მიზნით, ჰოსპიტლებსა და კლინიკებში მუდმივად ტარდება ტრენინგები ნარჩენების მართვასთან დაკავშირებით. ადამიანებისა და ბუნებისთვის ზიანის მიყენების თავიდან ასაცილებლად, კლინიკებში სამედიცინო და ბიოლოგიური ნარჩენების მართვას ახორციელებს სპეციალიზირებული კომპანია.
ჰოსპიტლების სექტორი ორიენტირებულია, იპოვოს სამედიცინო და ბიოლოგიური ნარჩენების შემცირების ინოვაციური გზები და საქართველოში საერთაშორისოდ აღიარებული საუკეთესო პრაქტიკა დანერგოს. კონტრაქტორების სანდოობის მუდმივი უზრუნველყოფის მიზნით, ჰოსპიტლებში მუდმივად ხორციელდება თვიური ანგარიშგების კონტროლი და, საჭიროების შემთხვევაში, კონტრაქტორებს ეკისრებათ ჯარიმა. 2023 წელს არსებულ 763 ტონასთან შედარებით, 2024 წელს ჰოსპიტლებში არსებულმა სამედიცინო ნარჩენებმა 750 ტონა შეადგინა.
